الرئيسية

خالد أبوبكر يكتب : ‎اللي سرق مصر كان في الأصل مصراوي 


خالد أبوبكر

  
11/30/2018 7:22:27 PM

‎حاجة تحزن، مصريون سرقوا أرض بلدهم، طب دول حرامية وعرفنا، كنتي فين ياحكومة من زمان؟ بعد نوم سنين انجاز في ايام، الساكت عن الجريمة شريك فيها، وأكيد حصل ظلم نتيجة سرعة التنفيذ.
‎في مشكلة كبيرة اتربينا عليها في بلدنا وهي العرف الخاطئ المسكوت عليه .
‎ومن ضمن الذي كان مسكوتا عليه ايضا موضوع وضع اليد، والموضوع ده باختصار يتمثل في الاتي :
‎حضرتك بما لك من نفوذ او قوة عددية تنزل علي قطعة ارض ملك للدولة وتروح داخل قاعد فيها انت ورجالتك وتحرسها او تزرعها اوتبني عليها زي ما تحب وهتلاقي جهات حكومية اتعاملت معاك في بعض الاجراءات زي المياه او الكهرباء بنظام المقايسة اي باختصار انه طالما انت قاعد قاعد وبتسرق الكهرباء فهناخد منك حق سرقة الكهربا وبس لحد مانشوف السريقة الكبيرة اخبارها ايه
‎وسنتين تلاتة وتبيع الارض لواحد تاني جري العرف علي انه يشتري ويدفع فلوسا كتيرة للراجل الاول اللي مسكين تعب وسرق ارض الدولة
‎وبيني وبينك الدولة عارفة من زمان ان الكلام ده بيحصل..
‎طيب بعد ما الرئيس السيسي مسك البلد اصدر قرارا بتشكيل لجنة استرداد الاراضي واصدر قرارا اخر بجعل قراراتها ملزمة لكافة اجهزة الدولة، وفتحت اللجنة الباب علي مصرعيه لأي حد عاوز يقنن وضع يده علي اي ارض، لأن في ناس اشترت الارض من واضع اليد وزرعتها وتعبت فيها واصبحت تدر دخلا بيفتح بيوت ناس كتير وهي مشروعات زراعية سليمة ومنتجة .
‎فقامت اللجنة بدراسة الاف الطلبات من الجادين الذين يطلبون دفع حق الدولة والاحتفاظ بمشارعيهم الزراعية علي هذه الاراضي
‎واذ فجأة يصدر الرئيس قرارا بصفته رئيس المجلس الاعلي للاستثمار يقول ان من اراد ان يصحح وضعه ويدفع حق الدولة نقدي وبشكل مباشر سيحصل علي خصم ٣٥ ٪‏ .
‎يعني سيادتك فتحت الباب وهانعطيك الحق كاملا وكمان خصم كبير لكن عليك ان تتوجه للجنة وتبدي حسن نية وجدية
‎طبعا في ناس محترمين كتير راحوا وتعاملوا مع اللجنة ومشيت الامور (بما لها وما عليها) لكن كان هناك جدية من الدولة في التعامل
‎وللامانة قامت اللجنة بمجهود ضخم في ازالة التعديات علي الاراضي، لكن كل ذلك في حدود ما لديها من امكانيات .
‎واذ فجأة مرة اخري الرئيس السيسي يعطي مهلة شهرا كي تنتهي ظاهرة وضع اليد علي اراضي الدولة وطبعا الكل عارف ان الرئيس لو قال شهرا يبقي بعد الشهر اللي مش هينفذ هيقعد في بيتهم .
‎وقامت الدنيا في كافة محافظات مصر بلدوزارات شغالة وديناميت ونسف ومافيش تفاهم المباني الشاهقة تقع علي الارض في ثواني
‎لكن تعالوا نحلل كل ذلك :
‎الطرف الاول.. مصري ابن مصري استحل ارض بلده ووضع ايده عليها واستخدم نفوذه وبلطجته وعمل ثروة من لا شئ لما باعها للطرف الثاني
‎الطرف الثاني.. المشتري اللي دفع ملايين في اراضي او شقق ليست ملك بائعها ولكن اتبع العرف وقام واستصلح هذه الاراضي.
‎الطرف الثالث.. الدولة
‎وهي النائمة علي كل هذه الامور لحين يريد الرئيس او ينوي وبعدها يبتدي التنفيذ
‎الطرف الرابع سلطة التنفيذ
‎وهي جزء من الدولة وهي عبارة عن مدير الامن ومأمور القسم وضابط المباحث، يأتي له قرار الازالة وهو لا يعلم اين الحق هو راجل ينفذ فقط وبالقوة  ‎فقرار الازالة اما من المحافظة او من الوزارة او من اي جهة حكومية، وعلي قوة التنفيذ الا تتفاهم بل وممنوع عليها التفاهم لو في ستات تنزلهم لو في منقولات يخرجوها ديناميتك معاك وبلدوذراتك وقدامك ساعتين زمن.....
‎طيب : ‎اول واحد وده مصري حرامي، تاني واحد وده حسن النية والجاد منهم اموره اتحلت،، لكني انتي يادولة عاوزة تحلي كل هذه الامور في شهر ودون اخطاء !! ودون ظلم !!
‎لكني كنت اري ان تمنح مهلة نهائية شهرا واحدا فقط يصدر خلالها تعليمات مشددة لكل المخالفين بأن بنهاية الشهر ستكون هناك ازالة للتعديات فورية وبعد انتهاء الشهر نقوم بالازالة التي لا يوقفها شئ سوي القانون علي ان تدعم القوة المنفذة بعناصر قانونية للفصل الوقتي فيما اذا كان الحائز له الحق في ايقاف التنفيذ
‎انتهي الشهر تقريبا وسيقف الجميع امام الرئيس كي يقدموا تقريرهم وبالتأكيد لهم منا احترام وتقدير كبير فقد خلصونا من سارقي الدولة الذين اغتنوا علي حساب ابنائها، لكن اخشي من دعوة المظلوم وقد يكونوا اقلية  ‎فعلينا ان نحمي اراضينا من الذين ارادوا سرقتها وعلينا ايضا ان نحاول الا نظلم ونحن نقوم بهذا العمل الذي تأخر لسنوات
‎وبقول لحضرتك ايه : تفتكر ليه اللي قبل السيسي ما فكروش يرجعوا حق البلد في الارض دي ؟ حد عنده اجابة؟

عدد المشاهدات 48

الكلمات المتعلقة :